Universitetet i Bergen : Doktorgrader : 2013

NY DOKTORGRAD

Grunnleggande kjemiske eigenskapar hos umetta hydrokarbon

Alf Holme   

Alf Holme disputerer onsdag 27. februar 2013 for ph.d.-graden ved Universitetet i Bergen med avhandlinga:

«Chemical Properties of Alkenes and Alkynes from Carbon 1s Photoelectron Spectroscopy and Theory».

Hydrokarbon består av hydrogen og karbon og kallast umetta når det er i stand til å «ta opp» meir hydrogen. Alken og alkyn er eksempel på umetta hydrokarbon, og har vist seg å vere reaktive for enkelte typar kjemiske reaksjonar. I tillegg kan somme av dei eksistere i ulike strukturelle former. Dette er grunnleggande kjemiske eigenskapar som i denne avhandlinga har blitt studert ved hjelp av ein kombinasjon av røntgenlys og teoretiske modellar.

Røntgenlys vert brukt til å måle energien som skal til for å fjerne bestemte elektron i hydrokarbona. Denne energien, som vert kalla for ionisasjonsenergien, inneheld ulik informasjon om hydrokarbona. Sidan ein er avhengig av å måle energiane med høg presisjon og nøyaktigheit, har avansert eksperimentelt utstyr blitt nytta. Denne teknikken vert kalla fotoelektronspektroskopi og har blitt utført ved synkrotronanlegg.

Ein treng verktøy for å kunne hente ut all informasjonen som ligg i datasettet frå eksperimentet. Dette vert oppnådd ved bruk av teoretiske modellar og kraftige datamaskiner. Ved å flette saman teori og eksperiment har vi no fått ny kunnskap om viktige kjemiske eigenskapar til ein serie alken og alkyn, samt utforska avgrensingane ved å nytte denne teknikken til slike studiar.

Personalia:
Alf Holme (f. 1977) er opphaveleg frå Hyen i Sogn og Fjordane. Han har bachelorgrad innan analytisk kjemi frå Universitetet i Agder (1999) og cand. scient.-grad innan fysikalsk kjemi frå Universitetet i Bergen (2002). Forskningsarbeidet under ph.d.-graden blei utført i perioden frå 2007 til 2011 ved Kjemisk Institutt ved Universitetet i Bergen under leiing av professorane Leif J. Sæthre og Knut J. Børve. I august 2011 blei han tilsett i Statoil der han arbeider på råolje- og produktlaboratoriet ved raffineriet på Mongstad.

Tid og stad for prøveforelesinga:
07.02.2013, kl. 13.15. Oppgitt emne: “Chemical information from double core-hole spectroscopy”.
Stad: Rom 2018, 2. etg., Realfagbygget, Allègaten 41.

Tid og stad for disputasen:
27.02.2013, kl. 12.15, Auditorium 5, Realfagbygget, Allègaten 41.

Kontaktpersonar:
Alf Holme, mob. 900 83604, e-post: alf.holme[ætt]kj.uib.no

Mediekontakt ved Kommunikasjonsavdelinga
E-post: mediekontakt[ætt]uib.no
Telefon: 55 58 89 00

Avhandlinga kan lånast på Bibliotek for realfag. Avhandlingen er tilgjengelig i BORA. For kjøp/bestilling av avhandlinga, kontakt kandidaten direkte.