NY DOKTORGRAD

Genetiske studiar av manisk-depressiv sinnsliding

Gry Sjøholt disputerer fredag 21. mars 2003 for dr. scient. graden ved Universitetet i Bergen med avhandlinga:

"A study of myo-inositol monophosphatase-encoding genes in manic-depressive illness".

Manisk-depressiv sinnsliding er ein alvorleg psykiatrisk sjukdom som karakteriserast ved tilbakevendande episodar med depresjon og mani. Arvelig predisposisjon er viktig for utviklinga av manisk-depressiv sinnsliding, men ein har så langt ikkje klart å påvise spesifikke gen som kan føre til denne sjukdomen. Litiumterapi er den vanlegaste medisinske behandlinga av manisk-depressiv sinnsliding, men ein veit ikkje korleis denne medisinen verkar stemningsstabiliserande.

I dette doktorgradsarbeidet har ulike genar som fungerer i eit litiumregulert signalsystem i nervecellene vorte studert. Eit av desse litiumregulerte gena, kalla IMPA2, har DNA variantar som er meir frekvente hjå manisk-depressive pasientar enn hjå kontrollpersonar i studiet.

IMPA2-genet ligg i eit område på kromosom 18 som tidlegare har vorte kopla til manisk-depressiv sinnsliding. Studiet indikerer at DNA-variasjonar i IMPA2-genet på kromosom 18 kan vere ein genetisk faktor som gjev predisposisjon for manisk-depressiv sinnsliding.

Personalia:
Gry Sjøholt vart fødd i 1972 og er frå Ørskog kommune på Sunnmøre. Ho tok cand. scient. eksamen i biokjemi ved Universitetet i Bergen i 1997. Sidan har ho vore tilsett som stipendiat ved Pediatrisk institutt, Det medisinske fakultet med arbeidssted i Dr. Einar Martens forskningsgruppe, Haukeland universitetssykehus.

Tid og stad for disputasen:
21.03.2003, kl. 11:15, Auditoriet, Pediatrisk Institutt, Barneklinikken, Haukeland universitetssykehus.

Kontaktpersonar:
Gry Sjøholt, tlf. 55975326 (a), epost: gry.sjoeholt@haukeland.no
Formidlingsavdelinga v/ mediekontakt Ingunn Vie Skare, tlf. 55 58 91 70 (a), e-post: ingunn.skare@form.uib.no

Avhandlinga kan lånast på Det matematisk-naturvitskaplege fakultetsbibliotek. For kjøp/bestilling: kontakt kandidaten direkte.