NY DOKTORGRAD
Simulering av væskeflyt i komplekse bergartar
 |
"Reservoir simulation on heterogeneous and anisotropic media with imposed flux continuity conditions for general gemetries, and the inclusion of hysteresis in forward modelling".
Temaet i avhandlinga er simulering av væskeflyt i porøse media der geometrien kan vera kompleks, og ein har store variasjonar i bergartsparametrar.
Eit oljereservoar er eit porøst medium (type sandstein) som inneheld olje og gass (i 'tomrommet' i steinen). I Nordsjøen finn vi slike reservoar fleire tusen meter under havbotnen.
Utstrekkinga til reservoaret kan vera mange kilometer i lengde og breidde, men sjeldan meir enn nokre hundre meter i høgd. Geologien vil ofte vera kompleks, og reservoaret kan innehalda sprekkar og forkastingar.
Å simulera væskeflyt i eit oljereservoar er det same som å gje eit bilete av korleis ting vil utvikla seg i tid under gitte føresetnader. Dette er særs viktig informasjon å kjenna for oljeselskap som skal utvinna olje og gass. Oljebrønnar er dyre å bora, og medan eit felt er i drift kan strategien for å få mest mogeleg olje ut av reservoaret endra seg basert på informasjon ein kan få ved å gjera simuleringar.
Hovudtemaet i doktorgradsarbeidet har vore å analysera og utvikla såkalla 'fleirpunkt fluks approksimasjons metodar' for å kunna bruka dei til simulering av væskeflyt i porøse media med kompleks geometri og sterkt varierande bergartsdata. Numeriske forsøk er gjort både for einfase- og tofase-flyt. Siste del av arbeidet omhandlar irreversible prosessar, og korleis ein modellerer slike numerisk.
Personalia:
Geir Terje Eigestad, født 24.03.1973, kjem frå Røldal, og er no busett i Bergen. Han tok cand. scient.- graden i mars 1999, og arbeidde på Parallab ved UiB fram til februar 2000. Han har vore tilsett ved Matematisk Institutt som stipendiat sidan mars 2000. Norsk Hydro har finansiert stillinga.
Tid og stad for disputasen:
23.05.2003, kl. 10:00, Auditorium Pi, Autogården, Johannes Brungsgt. 12.
Kontaktpersonar:
Geir Terje Eigestad, tlf.: 55584871, 93495514, epost: geirte@mi.uib.no
Formidlingsavdelinga v/ mediekontakt Ingunn Vie Skare, tlf. 55 58 91 70 (a), e-post: ingunn.skare@form.uib.no
Avhandlinga kan lånast på Det matematisk-naturvitskaplege fakultetsbibliotek. For kjøp/bestilling: kontakt kandidaten direkte.