Universitetet i Bergen : Doktorgrader : 2003

NY DOKTORGRAD

Nøsta parallellisering og adaptiv gitterforfining

   
Cand. scient. Ragnhild Blikberg disputerer 4. april 2003 for dr. scient.-grada ved Universitetet i Bergen med avhandlinga:

"Nested Parallelism in OpenMP with Application to Adaptive Mesh Refinement".

Å rekna ut løysingar til fysiske problem kan ofte vera svært ressurskrevjande når det gjeld bruk av reknekraft. Difor er det viktig å utvikla effektive løysingsmetodar for å utnytta kapasiteten til superdatamaskiner. I si avhandling har Blikberg studert to vegar ein kan gå for å auka ytinga til ein metode på: adaptiv gitterforfining (AGF) og nøsta parallellisering.

I eit løysingsområde vil trongen for tettliggande gitterpunkt i mange tilfelle variera frå delområde til delområde. For å skildra eit fenomen, vil interessante" områder trenga tette gitterpunkt, medan mindre "interessante" områder vil kunna klara seg med spreidde gitterpunkt. Kva områder som treng tette/spreidde gitterpunkt kan og variera i tid. AGF gjer det mogeleg å tilpassa tettleiken av gitterpunkt frå delområde til delområde, og frå eit tidspunkt til eit anna. Blikberg har i si avhandling studert kostnadane og gevinsten ved å bruka AGF samanlikna med å bruka tettliggande gitterpunkt i det totale løysingsområdet.

Når eit arbeid kan delast opp i mindre oppgåver som kan gjerast uavhenging av kvarandre, og dermed løysast samstundes, har ein parallellitet. Når kvar av desse oppgåvene igjen kan delast i uavhengige deloppgåver, får ein "nøsta parallellitet". I avhandlinga har det blitt utvikla ein teknikk for å utføra nøsta parallellisering, og denne viste seg å vera naudsynt for å oppnå god yting. Dette både for ei statisk (fast) og ei dynamisk (varierande) mengde oppgåver og deloppgåver. Spesielt var dette tilfellet for eit AGF-program.

Arbeidet med avhandlinga er gjennomført med professor Tor Sørevik som
rettleiar.

Personalia:
Ragnhild Blikberg (30) er fødd og oppvaksen på Voss. Ho er utdanna cand.scient. ved Matematisk institutt, Universitetet i Bergen i 1997. Etter to år som forskar ved Parallab, UNIFOB, vart ho i 1999 tilsett som stipendiat ved Institutt for informatikk, med pliktarbeid på Parallab, Universitetet i Bergen. Ragnhild Blikberg arbeider i dag som forskar ved UNIFOB, Avdeling for beregningvitenskap (BCCS).

Tid og stad for disputasen:
04.04.2003, kl. 14:15, Rom 2142, Datablokken, Høgteknologisenteret, Thormøhlensgt. 55.

Kontaktpersonar:
Ragnhild Blikberg, tlf: 55 58 41 66 (a), , epost: ragnhild@ii.uib.no
Formidlingsavdelinga v/ mediekontakt Ingunn Vie Skare, tlf. 55 58 91 70 (a), e-post: ingunn.skare@form.uib.no

Avhandlinga kan lånast på Det matematisk-naturvitskaplege fakultetsbibliotek. For kjøp/bestilling: kontakt kandidaten direkte.