Universitetet i Bergen : Doktorgrader : 2003
NY DOKTORGRAD
Fiskeryggar – potensial for verdiskaping?
 |
”Enzymic hydrolysis of salmon frames with ProtamexTM: Dietary impact of the produced fish protein hydrolysate on lipid metabolism in obese Zucker rats”.
Avhandlinga omhandlar arbeidet med å framstille eit proteinrikt produkt frå fiskemuskel som er igjen på lakseryggen etter filetering, samt utprøving av dette i forsøksdyr. For å skilje muskelen frå ryggbeinet, blei det nytta ei kommersielt tilgjengeleg enzymblanding som blir brukt i næringsmiddelindustrien, kalla ProtamexTM. Fiskemuskel protein, som i stor grad er lange proteinkjeder, vert kortare ved bruk av enzym, då enzyma verkar som ei saks på proteinkjedene. Denne reaksjonen skjer i tankar med fiskeryggar, vatn og enzym. Korte proteinkjeder er meir vassløyselege enn lange, slik at fiskeproteinet som i utganspunktet var lite vassløyseleg, no er løyst frå beinet og fins i vatnet. Sjølve ryggbeina blir i liten grad påverka av enzyma. Gjennom sentrifugering blir lakseoljen skild frå vatnet og det feittfrie vatnet som inneheld fiskeprotein, tørkast til eit proteinrikt pulver.
Frå studie med forsøksdyr er det kjend at ulike typar protein i kosten påverkar mengde kolesterol i blodet. Det er godt dokumentert at soyaprotein har ein gunstig, medan mjølkeprotein har ein ugunstig påverknad på blodkolesterol. Effekten av det produserte fiskeproteinet vart samanlikna med soya og mjølkeprotein i ein rottemodell som liknar på overvektige menneskjer. Fiskeproteinet reduserte blodkolesterolet i forhold til mjølkeprotein. Utvikling av feittlever, eit aukande problem i samanheng med overvekt, vart redusert med fiskeprotein relativt til mjølkeprotein. Soyaprotein var endå meir effektivt enn fiskeprotein, både i reduksjon av blodkolesterol og feittlever. Dette var eit innleiande studie med bruk av fiskeprotein og meir arbeid er naudsynt for å få kjennskap til rett bruksområde for det produserte fiskeproteinet.
Personalia:
Bjørn Liaset (31) er fødd og oppvaksen på
Nordfjordeid. Han byrja å studere ved Universitetet i Bergen i
1993 og avla cand. scient. eksamen i 1998. Liaset har arbeid med
doktorgradsavhandlinga sidan 2000 og vil i framtida arbeide som forskar
ved Nasjonalt Institutt for Ernærings- og Sjømatforskning
(NIFES).
Tid og stad for disputasen:
19.09.2003, kl. 10:30, Auditorium Pi, Autogården, Johs. Brunsgt.
12
Kontaktpersonar:
Bjørn Liaset,55 90 51 14, epost: bjorn.liaset@nutr.fiskeridir.no
Formidlingsavdelinga v/ mediekontakt Monika Sandnesmo, tlf. 55 58 91 70 (a),
epost: monika.sandnesmo@form.uib.no
Avhandlinga kan lånast på Det matematisk-naturvitskaplege fakultetsbibliotek. For kjøp/bestilling: kontakt kandidaten direkte.