Universitetet i Bergen : Doktorgrader : 2001

NY DOKTORGRAD

God forretningsskikk næringsdrivande imellom

   
Førsteamanuensis cand. jur. Tore Lunde disputerer for dr. juris-graden ved Det juridiske fakultet, Universitetet i Bergen med avhandlinga

"God forretningsskikk næringsdrivande imellom"

Avhandlinga (560 sider) omhandlar spørsmål som oppstår ved rettsbruk basert på den rettslege standarden god forretningsskikk, med utgangspunkt i marknadsføringslova § 1. Hovudspørsmålet knyter seg til korleis ein nærare skal resonnere rettsleg i tvistar som gjeld grensa mellom lojale og illojale konkurransehandlingar.

I den metodisk orienterte delen av avhandlinga drøftar forfattaren rettsbruk basert på rettslege standarder, mellom anna kva rettskjeldemessig vekt ein kan legge på praksis utvikla gjennom private konfliktløysingsorgan. Trass i at slik praksis kvantitativt spelar ei dominerande rolle, viser drøftingane at den rettskjeldemessige vekt av slik praksis er avgrensa.

Den andre del av avhandlinga drøftar standarden god forretningsskikk i ulike konfliktsituasjonar. Desse analysene omhandlar grensene for adgangen til å etterlikne andre næringsdrivande sine prestasjonar og immaterielle rettsposisjonar, typisk når prestasjonane fell utanfor det vern som kan utleiast av immaterialrettslege lover som patentlov, varemerkelov, opphavsrettslov etc. Andre konflikttypar som vert drøfta, er etablering av verksemd i konkurranse med tidlegare arbeidsgjevar eller andre samarbeidspartar, tredjemanns inngrep i kontraktsforhold og grenser for omtale av konkurrentar/kommersiell ytringsfridom.

Personalia:
Tore Lunde er fødd i 1963, og er frå Stryn. Han vart cand. jur. i 1989. Etter jusstudiet arbeidde Lunde som advokatfullmektig i advokatfirmaet Wikborg, Rein & Co., Bergen, frå 1990 til 1995, med unntak av eitt år som dommarfullmektig ved Voss sorenskrivarembete. I perioden 1996-2000 har Lunde vore tilsett som stipendiat ved Det juridiske fakultet, Bergen, og er tilsett som førsteamanuensis same stad.

Tid og stad for disputasen:
13.01.2001, kl. 10.15, Auditorium 2 i Jussbygget (Dragefjellet)

Kontaktpersonar:
Tore Lunde tlf. 55 58 95 52 (a), 55 19 84 06 (p), 957 30 414 (mobil),
e-post: Tore.Lunde@jur.uib.no
Informasjonsavdelinga v/ mediekontakt Morten Steffensen, tlf. 55 58 90 35 (a), epost: morten.steffensen@info.uib.no

Avhandlinga kan lånast på Det juridiske fakultetsbibliotek. For kjøp/bestilling: kontakt kandidaten direkte.